Kjempesuksess for postdoktor-program
UiT held fram med sterke søknadar og høg suksessrate i EUs karriere- og mobilitetsprogram MSCA, som sender topptalent til forskingsjobbar i Nord-Noreg.
– Dette er utruleg gledelege tal, seier prorektor for forsking og utvikling, Jan-Gunnar Winther.
– Om vi skal halde fram med å vere ein drivkraft i nord, må vi ha ein jamn straum av talent som kjem inn og er med på å løfte oss og landsdelen, held han fram.
Koplar garva veteranar med unge talent
Straumen av talent prorektoren snakkar om, er eit resultat av UiT si satsing på Marie Skłodowska-Curie Postdoctoral Fellowship (MSCA).
MSCA er ei ordning frå EU kor dyktige, potensielle postdoktorar vert kopla saman med garva forskarar som skal vere rettleiarar for dei på forskingsopphald i andre land. Det har sendt 38 lovande forskarar til UiT sidan 2016, og snart kjem det 11 til.
– UiT-forskarar sendte inn 31 søknadar om å få verte MSCA-rettleiarar i 2023. 11 er innvilga og 3 står på venteliste. Det er vi sjølvsagt særs godt nøgd med, seier Theresa Mikalsen.
Utruleg suksessrate for UiT
Mikalsen er seniorrådgjevar for ekstern EU-finansiering i Seksjon for forsking og innovasjon. Saman med Kata Bohus og Khadij Gharibi driv ho støttetenesta Arctic MSCA-PF Program, som hjelper UiT-forskarar finne og rekruttere yngre forskarar til samarbeid og innsending av felles søknad til EU sitt MSCA-program. Og tala tyder på at det verkar.
– 2023 er det beste året til no, med ein suksessrate på heile 35 %. Det er langt over det europeiske snittet på 15 %, seier Mikalsen.
Nokre miljø har vore ivrigare enn andre til å satse på MSCA. Mellom anna har lingvistikkmiljøet på HSL-fakultetet jobba over fleire år for å rekruttere høgkompetente MSCA-forskarar frå andre land. Lingvistane sjølve trur det er ei viktig årsak til at dei er rekna som det beste lingvistikkmiljøet i Noreg.
To av dei aksepterte søknadane for 2023 kjem frå BFE, tre frå NT-fak, ein frå Helsefak og fem frå HSL. Det er ytterlegare to søknadar frå HSL og ein frå Jurfak på ventelista.
Dei første Marie Skłodowska-Curie Postdoctoral Fellows-ane frå denne runden er venta til UiT til hausten.
Arctic MSCA hjelper òg postdok-kandidatar som vil reise på forskingsopphald utanfor Europa, såkalla Global Fellowships. Les meir om det eller korleis du kan får eit ungt talent til ditt prosjekt her: https://uit.no/arcticmsca.
