Det norske fagmiljøet i nordisk språkvitskap har dei siste åra samarbeidd om å skriva ei ny, stor norsk språkhistorie (jf. nettside: http://nsh.novus.no/).
Dette verket skal bestå av fire bind:
Bind I Mønster følgjer utviklinga av dei ulike delane av språksystemet – fonologi, morfologi, syntaks, ordforråd og tekst – frå urnordisk til i dag.
Bind II Praksis beskriv sentrale sider ved korleis norsk har vore brukt opp gjennom tidene, pluss andre språk enn norsk som har hatt ein plass i det norske språksamfunnet.
Bind III Ideologi handlar om språkpolitikk og oppfatningar av og haldningar til språk.
Bind IV Tidslinjer tek for seg dei åtte ulike periodane som norsk språkhistorie her er delt inn i, frå den eldste tida (–700) til det moderne Noreg (1945–2015).
Bind I av språkhistoria, som åleine er på 681 sider, kjem ut i april. Planen er at bind II og IV skal koma ut seinare i år og bind III neste år.
Frå UiT Noregs arktiske universitet er det tre personar som har delteke i arbeidet med denne nye språkhistoria: Universitetsbibliotekar Philipp Conzett har skrive delar av morfologikapittelet i bind I. Professor Endre Mørck har skrive syntakskapittelet i bind I og kapittelet om seinmellomalderen (1350–1536) i bind IV. Professor Tove Bull har skrive om bruk av andre språk enn norsk i bind II, vore redaktør for bind III og dessutan vore UiT sin representant i styringsgruppa for heile prosjektet.
Redaktør for bind I er professor Helge Sandøy frå Universitetet i Bergen. Han er i tillegg den eine av dei to hovudredaktørane for heile verket og har bidrege som forfattar i bind I, II og III. Sandøy vil saman med dei tre nemnde UiT-forfattarane/-redaktørane delta på boklanseringa. I samband med lanseringa vil Helge Sandøy òg halda ei gjesteførelesing om eit tema knytt til norsk språkhistorie.