Havet bidreg til å smelta isen i Antarktis
Ny avhandling ved UiT viser at to sentrale mekanismar gir issmelting i Antarktis.
 |
| Forskar Tore Hattermann på feltarbeid på fimbulisen. Foto: Elvar Ørn Kjartansson, Norsk Polarinstitutt |
Omtrent halvparten av smeltinga av innlandsis i Antarktis skjer på undersida av flytande isbreer, såkalla ”isbremmar”. Desse er fleire hundre meter tjukke, og Fimbulisen i Dronning Maud Land er den største isbremmen i norsk sektor.
Det viser en ny doktorgrad ved Universitetet i Tromsø. Tore Hattermann disputerer 10. desember med avhandlinga “Ice Shelf - Ocean Interaction in the Eastern Weddell Sea, Antarctica”.
I doktorgradsarbeidet viser Hattermann at havet fører varme inn under isbremmane ved to ulike mekanismar: Den eine er at soloppvarma overflatevatn blir stua opp framfor isfronten og dytta under isen av dominerande austlege vindar i området. Den andre mekanismen bringar relativt varmt djupvatn opp på kontinentalsokkelen og inn under isen.
Smeltinga i Dronning Maud Land står dermed i kontrast til Vest-Antarktis, der oppstrøyming av varmt djupvatn er sterkare og bidreg til svært effektiv smelting.
Resultata frå Hattermanns forsking er viktige for å forstå framtidige endringear i det globale havnivået.
– Viss vi vil forstå kva som skjer med isen i Antarktis og klimaet vårt i framtida, må vi forstå samanhengen mellom endringar som skjer i atmosfæren og smelting som skjer fleire hundre meter nedi havet, seier Tore Hattermann.
Hattermann har gjort feltarbeid på Fimbulisen i tre somrar og analysert to år med målingar av temperatur, saltinnhald og havstraum frå instrument under den flytande isbremmen.
Doktorgradsarbeidet er en del av Norsk Polarinstitutts senter for is, klima og økosystem (ICE) og er utført av forskarar frå instituttet og samarbeidande nasjonale og internasjonale institusjonar.
