Sámegiela ja sámi girjjálašvuođa dutkan- ja bagadallansymposia
UiT Norgga árktalaš universitehta, Sámi allaskuvla, Ubmi universitehta ja Oulu universitehta Giellagas-instituhtta bovdejit buot sámegiela ja sámi girjjálašvuođa dutkiid, studeanttaid ja eará berošteddjiid searvat symposiai, mii lágiduvvo UiT Norgga árktalaš universitehtas Romssas 19.–20.10.2023. Oktasaš sámesymposiat leat lágiduvvon jagi 1993 rájes, ja daid ulbmilin leamaš álggu rájes čohkket sámegiela ja sámi girjjálašvuođa dutkiid ja doavttirgráda- ja masterstudeanttaid iešguđege guovlluin. Dán jagi seminára čatnasa maiddái riikkaidgaskasaš álgoálbmotgielaid logijagi, IDIL (2022-2032), čalmmustahttimii Romssa universitehtas.
Mii bovdet buot sámegiela ja sámi girjjálašvuođa dutkiid ja studeanttaid searvat miellagiddevaš symposiai.
Symposia sáhkavuorut sáhttet leat buotlágan fáttáin, mat mainna nu lágiin laktásit sámegiela ja sámi girjjálašvuođa dutkamii viiddes mearkkašumis. Sihtat sáddet ovttasiidosaš čoahkkáigeasu (abstrávtta) maŋimustá borgemánu 27. beaivve 2023. Sáhkavuoruid guhkkodat lea 20 minuhta + 10 minuhta ságastallamii.
Katri Hiovain-Asikainen / Divvun - UiT: Davvisámegiela hállansyntesa
Ilona Kivinen / Helssega universitehta: Adjektiivvaid geavaheapmi J.K. Qvigstada folkloremateriálas Lappiske eventyr og sagn
Sigbjørn Skåden / Freelancečálli: Sámi girječálli 21. jahkečuođis
Mana dieđiheapmái.
Berit Anne Bals Baal, UiT Norgga árktalaš universitehta
Hanna Mattila, Sámi allaskuvla
Hanna Outakoski, Ubmi universitehta
Markus Juutinen, Turku ja Oulu universitehtat
Konferánssa gulahallanolmmoš: Berit Anne Bals Baal, berit.a.baal@uit.no, tlf. (+47) 90547317