UiT lea veahkehan Apple ráhkadit ođđa boallobevddiid
Gávcci sámegiela ožžot dál sierra iOS-boallobevddiid. UiT lea leamašan mielde ráhkadeamen daid Apple:in. Lea vuosttáš geardde ahte stuora internationála fitnodat integrere reaidduid buot sámegielaid várás iežaset prográmmagálvui.
Ášši dárogillii logat dás.
Apple almmuhii gaskavahku ođđajagimánu 31. b. ođđa iOS boallobeavddi sámegielaid várás. UiT Norgga árktalaš universitehta, Divvun-joavku bokte, leat oassálastán prošeavtta. Divvun-joavku jođiheaddji ja váldoinšenevra, Sjur Nørstebø Moshagen, dadjá ahte Apple boallobeavdehábmen mearkkaša olu sámegiel geavaheaddjiide.
Šaddá mihá álkit čállit sámegiela go boallobeavddit leat juo ovdagihtii installerejuvvon Apple-buktagiiin. Dat mearkkaša maiddái olu skuvlaohppiide mat geavahit iPad oahpahusas, danin go dat maid doarju sámegielbustávaid olgguldas boallobevddin mat geavahuvvojit iPadain. Lea čielggas ahte dat lokte sámegielaid seailluheame, lohká Moshagen.
Dat gávcci sámegiela maidda fallojuvvot Apple ođđa boallobeavddi čovdosa leat: anárašgiella, gielddasámegiella, julevsámegiella, davvisáme- giella, bihtánsámegiella, nuortalašgiella, lullisámegiella ja ubmisámegiella.
Alla teknologiijadássi
Ovdal fertii viežžat sámegiel boallobeavddit Divvun-joavku sierra áppas. Divvun-joavku ráhkada maiddái stávendárkkistusaid, grammatihkkadárkkistusaid, hállansyntesa, elektrovnnolaš sátnegirjjid ja dihtorjorgalanvuogádaga, ovttasráđiid Giellatekno-joavkkuin UiT:s.
– UiT lea njunnošis ráhkadit sámegiel reaidduid. Mii fállát giellateknologalaš barggu internationála dásis. Lea vuosttáš geardde ahte min reaiddut geavahuvvojit ovtta internationála teknologiijafitnodatlágideadddji vuogádaga bistevaš oassin, dadjá Sjur Nørstebø Moshagen.
UiT háliida maiddái giitit earáid mat leat leamašan mielde ráhkadeamen daid gávcci boallobevddiid, earret eará Språkcentrum ubmisámegiela tearpmaiguin.
